أخبار العالم
الموضوع رقم واحد في العالم كله دلوقت هو فيروس كورونا، ودا طبيعي جدا نظرا لخطورته وانتشاره السريع، فيروس كورونا مش مجرد مرض عادي ولا طبيعي دا فيروس انتشر في الصين وبدأ يتسرب لدول تانية أعلنت عن وجود إصابات.
فيروس كورونا خطورته إنه أعراضه شبه أعراض الإنفلونزا العادية وبيؤدي لمرض الالتهاب الرئوي وبيتسبب في الوفاة، وظهر في مدينة “ووهان” عاصمة إقليم “هوبي” في الصين أخر السنة اللي فاتت وانتقل لمدن صينية تانية منها “بكين وشنغهاي” ثم بدأ بعدها ظهر في أمريكا وتايلاند وكوريا الجنوبية واليابان.
الفيروس تسبب في وفاة أكثر من 40 شخص في الصين والأعداد متوقع هتفضل في زيادة، والمصابين أكثر من 1300 شخص على مستوى العالم لحد دلوقت، وعشان كدا في حالة ذعر حول العالم في السلطات الصحية لمحاولة منع حدوث وباء عالمي، أغلب عدد المصابين دلوقت في الصين حوالي 1287 حالة مؤكدة.
حالات الوفاة معظمها حصل في مدينة ووهان الصينية وعشان كدا تم عزلها صحيا بشكل سريع عشان يتم احتواء انتشار الفيروس، الفيروس انتشر في عدد من الدول زي “تايلاند وفيتنام وسنغافورة واليابان وكوريا الجنوبية وتايوان ونيبال وفرنسا والولايات المتحدة وأستراليا، ماليزيا” عدد المصابين في الدول دي مش كتير لكن الخوف إن الفيروس دا بينتشر بنفس طريقة انتشار فيروس الانفلونزا يعني الوسيط بتاعه الهواء.
الصين فرضت اجراءات على مستوى البلد كلها للكشف عن حالات الإصابة المشتبهة في القطارات والطائرات والأتوبيسات لأن الأعداد عندهم بتزيد بشكل كبير، وأي حد هيشتبهه إنه مصاب يتنقل لمركز صحي، دا غير إنهم قفلوا 5 مدن جديدة فيها حوالي 56 مليون شخص لاحتواء المرض، كمان الحكومة استعانت بالجيش واستدعت وحدات لمواجهة الفيروس وبعتت فريق من 40 دكتور عسكري إلى ووهان لمواجهة تفشى الفيروس.
بمجرد انتشار الفيروس، مصر خدت إجراءات على طول من بداية الموضوع وتحديدا يوم 7 يناير، ومنظمة الصحة العالمية نفسها قالت إن مصر خدت كل الإجراءات الوقائية لمنع تسرب أي أمراض وبائية لمصر بما فيها كورونا، ومفيش أي حالات مرضية وصلت مصر ولم يكتشف أي حالة مصابة، ورغم كدا ضروري جدا نعرف برضوا أعراض الإصابة وطرق الوقاية
الأعراض:-
– صعوبة في التنفس.
– سعال.
– حرارة مرتفعة.
– سيلان الأنف.
– قىء
– إسهال
الأعراض متشابهة مع نزلات البرد العادية، لكن نزلة البرد بتكون الأعراض خفيفة ومحتملة لكن كورونا الأعراض بتبقى شرسة وكلها بتيجي مع بعض بشكل قوي وبتعمل التهاب رئوي وفي غضون 3 أيام يعقبه توقف أجهزة حيوية في الجسم زي الجهاز التنفسي والقلب وفشل وفاة الكلى وبيؤدي للوفاة.
طرق الوقاية:-
ــ تقليل التوتر والتغذية الجيدة والصحية لتقوية جهاز المناعة.
ــ الحذر عند استخدام العملات النقدية ولوحات المفاتيح ووسائل المواصلات
ــ بلع حبة من الثوم يوميا لأنها تساعد فى تقوية الجسم ضد الفيروسات.
ــ عزل أي مريض عنده برد عن الأصحاء وعدم استخدام أدواته التي يستخدمها.
ــ عدم وضع اليدين على الأنف أو العين أو الفم دون غسلها.
ــ طهي الطعام جيدا وخاصة البيض والدجاج.
– ارتداء القناع الطبى على الوجه يحمي من الفيروسات سواء نزلات البرد أو كورونا
– ارتداء قفازات اليد عند التعامل مع المصاب بفيروس البرد.
الخطوات الوقائية هدفها تحميك وتقوي مناعتك سواء ضد البرد الطبيعي أو فيروس كورونا ودا تعليمات بتقدم في كل الدول المصابة وغير المصابة بهدف الحد من انتشار الفيروس والسيطرة عليه.
